Yes, Benjamin my Prince!

Þetta á eftir að ganga mjög vel. Álíka vel og hjá Ólafi Ragnari Hannessyni að fá 25 milljónir frá Benjamín. Held að þessi rektor sé á einhverjum vafasömum DeCode-gleðibankinn-Íslandgeturallt ofskynjunarlyfjum. Nema náttúrulega að sviðið verði valin af kostgæfni, t.d. tel ég raunhæft að Háskóli Íslands geti rekið eina af 10 bestu deildum í heimi í ÍSLENSKU.

 

Að því gefnu að þessir steinaldarmenn í amasón sem fundust um daginn tali ekki íslensku eins og haldið hefur verið fram. Eru þetta ekki afkomendur Brasilíufaranna íslensku?


mbl.is HÍ byggir upp afburðasvið
Tilkynna um óviðeigandi tengingu við frétt

Jeppar og strípihneigð.

Ég ek um á Vespu. Þess vegna geta menn og konur með heví issjú ekki látið það vera að reyna að hnýta í mig, enda skortir þessi grey sjálfsöryggið (eða hrokann) til að vera svona nakinn. Vespuakstur er ekkert annað en blússandi natúralismi, vespan eins og klæðlítil lendaskýla við hliðina á þeim Viktoríukjólum og korselettum sem þessir stirðbusalegu jeppar eru. Undanfarna daga hefur hið skítlega innra með mér haft ástæðu til að gleðjast, sjálfur andskotinn sem það hlakkar í mér og ég á eftir að brenna í helvíti fyrir það. Múgmenni þau sem mest hafa þanið sig fá nú illilega að kenna á karmanu, stjórnlaust olíuverðsbálið er farið að svíða á þeim stélfjaðrirnar, sem flestar eru í erlendri mynt. Nú hjóla ég um göturnar öskrandi af hlátri og finn hornin vaxa á enninu, við hverja olíuverðshækkun. Sjálfsagt á ég eftir aka í veg fyrir pallbíl í einhverju hláturskastinu fá þannig að bragða á karmanu.  Mæli annars með því að þið eyðið minna bensín og fáið ykkur vespu eins og ég. Þeir sem eru með umhverfið á sálinni geta svo látið rigna almennilega upp í nefið á sér þegar þeir eru komnir á þessi undratæki.

www.vespur.is  


mbl.is Eldsneyti hækkar um 6-7 krónur
Tilkynna um óviðeigandi tengingu við frétt

Hundkvikindið lúkas og móðursýki.

Þetta er ömurlegt. Alveg ömurlegt. Hvernig heldur malbiksslektið eiginlega að kvikindin í náttúrunni hafi í sig. Heldur það að mávar lifi á kókópöffsi eða éti einfaldlega nógu óspennandi dýr til að  Disneylegar hugmyndir þeirra um náttúruna verði ekki fyrir áreiti veruleikans. Dýr éta önnur dýr. Úrkynjaður skríllinn vílar ekki fyrir sér að éta skepnur svo lengi sem hann þarf ekki að sjá eða heyra neitt sem slátruninni kemur við, en ofbýður svo þegar aðrar skepnur berjast við að hafa í sig.

Landsins ömurlegustu synir og dætur kveiktu á kertum út af hundi sem átti að hafa verið drepinn. Nú um daginn fóru 10.000 manns á einu bretti í Kína, engin kerti.  

það þunglyndislegasta í þessu öllu saman er þó sennilega blaðamaðurinn sem notar orðið harmleikur um álftareggjaátið og steypir sér svo í botnlaust tilfinningarúnk. Ef þetta er harmleikur er víst eins gott að hlaupa til og skjóta sig strax því náttúran en svo botnlaus af harmleikjum að við verðum öll búin að missa lífsviljan fyrir kvöldmat. 


mbl.is Harmleikur á Bakkatjörn
Tilkynna um óviðeigandi tengingu við frétt

Löggan eru ekki fasistar.

"Löggan eru fasistar" söng vonbrigði. Eða nefrennsli. Eða einhver pönksveit.En hver svo sem söng þetta þá er þetta ekki rétt. Það eru trukkabílstjórarnir sem eru fasistar.

 Um árið komust nasistar til valda með misjöfnum meðulum, meðal annars með því að leita þá uppi og lemja sem voru þeim ekki sammála, kommúnista að stórum hluta. Kommúnistar beittu svipuðum meðulum eftir mætti en fasistar voru fleiri og höfðu þar að auki yfir að ráða vörubílum í flestum stærri borgum til að komast sem hraðast á milli staða og berja á þar sem fæstir voru til varnar. Til að enginn ruglist skal áréttað að hér er ég að tala um ástandið áður en þeir urðu ríkisvaldið sjálft, weimarlýðveldið var valdið. En sumsé, ef þú hélst pólitískan fund var eins víst að nasistar mættu á svæðið og lemdu alla viðstadda í klessu, ekki þýddi mikið að hringja á lögguna því hún var fámenn við hliðina á óeirðaseggjunum og ekki vopnuð að ráði. Reyndar þurfti ekki að vera að ybba sig til að vera laminn, gyðingar máttu þola að vera barðir og ofsóttir,eigur þeirra skemmdar og samkomuhús svívirt. Ríkisvaldið fylgdi umburðarlyndri stefnu, sendi ekki her manna með vopn til að stöðva óöldina heldur samdi við nasista og lúffaði svo innilega fyrir þeim að öllum mátti vera ljóst að það voru þeir sem höfðu valdið en ekki aðrir. Sendi kannski menn til að skríða fyrir Hitler.

Við búum í lýðræði. Við kjósum á fjögurra ára fresti og liðið sem við kjósum setur lög. Löggan sér um að lögunum sé framfylgt. Ef á mér er brotið vil ég fá það bætt, eða að minnsta kosti að sá sem braut á mér verði refsað. Það eru trukkabílstjórarnir sem beita ofbeldi gagnvart samborgurum sínum og meina þeim að komast leiðar sinnar. Það er lögreglan sem reynir að ryðja leiðina fyrir mig og handtaka þá sem brjóta á mér. Stundum þarf hún að nota kylfur og jafnvel "GAS!! GAS!! GAS!!" við það. Só bí itt. Ríkið hefur einkaleyfi á ofbeldi, og má bara nota það gegn þeim sem beita ofbeldi.

Þið sem hafið lýst yfir stuðningi við Sturlu og félaga, Ég vona að ykkur verði grimmilega mál að komast á klósettið, sitjandi í umferðarhnút fyrir aftan mótmæli. Að örðum kosti vona ég að einhver taki sig til og eyðileggi eitthvað sem ykkur þykir vænt um til að mótæla einhverju sem er ykkur aldeilis óviðkomandi.


Hvað er eiginlega að í Austurríki?

Þessir Austurríkismenn. Það er alveg sama hvað er í gangi, ef það er nógu innilega sjúkt er nokkuð líklegt að það sé í gangi í Austurríki. Kerlingin sem drap börnin sín, geymdi í frysti og gróf undir gólfi fannst þar nýlega. Svo þessi Priklopril perri sem geymdi Natöschu Kampusch í kjallaranum í tíu ár. Og núna þessi hryllingur. Hvernig stendur á því að þessi meðalstóra þjóð elur af sér hvern hryllinginn af fætur öðrum? Manni dettur einna helst í hug Belgía með sína foráttuperra ef maður á að finna eitthvað í líkingu við þetta. Belgía og Austurríki. Svo sem svipuð ríki, hvorugt "alvöru" land að neinu leyti, austurríki hliðarríki við Þýskaland og engin sérkenni frekar en eitthvað sambandslandið þar, og Belgía er náttúrulega bara grín, tvær þjóðir í einu landi, Frakkar hreinir og klárir annars vegar og svo hálf-Hollendingar. Ekki furða að ESB bákninu hafi verið drullað niður í Belgíu, svona gersamlega hlutlausu svæði.

Já, og svo má ekki gleyma Austurríkismanninum Hitler. Hann var nú meiri kallinn. 


mbl.is Píslarvættið í hryllingshúsinu
Tilkynna um óviðeigandi tengingu við frétt

Leður og Handjárn.

klárt mál hvað þessum gæja gekk til. Barði löggu í andlitið og varð að ósk sinni. Búið að snúa hann niður, handjárna hann og konan stendur yfir honum skólausum og segir honum fyrir verkum meðan  leðurklæddur gaur horfir á. Hann á eftir að endurlifa þetta í sturtunni nokkrum sinnum. 

 Kannski sturtunni á litla-hrauni?


mbl.is Ráðist á lögregluþjón
Tilkynna um óviðeigandi tengingu við frétt

Hemmi Gunn, Pabbi og bílabrautir.

Ég man eftir einni auglýsingu sem beint var að mér á ósvífinn hátt þegar ég var krakki. Helvítið hann Hemmi Gunn reyndi að skrökva í mig, þessi annars geðþekki og skemmtilegi maður. Hemmi reyndi að troða inn hjá mér ranghugmyndum og espa mig upp á móti foreldrum mínum, láta mig terrorisera heimilið í hedónísku frekjukasti. Hann var sem sagt að reyna að selja mér bílabrautir. Í auglýsingunni mærði hann bílabrautir eins og við var að búast en klykkti svo út með orðunum "mundu eftir bílabrautum næst þegar þú ferð út í búð".

Mundu eftir.

Já, Hemmi lét sem svo að það þyrfti ekki annað en að muna eftir þessu smáræði. Einhvertíma sat ég og horfði á sjónvarpið þegar auglýsingin birtist á skjánum. Eftir að hafa setið eins og negldur og látið Hemma ljúga í mig snéri ég mér að að pabba. Þar blasti við mér furðuleg sjón. Pabbi var nefnilega að stara á mig í stað þess að horfa á sjónvarpið og áður en ég náði að segja nokkuð spurði hann, greinilega búinn að sálgreina mig "heldur þú að þetta sé svona einfalt, það þurfi bara að rétt sisvona að muna eftir að kaupa þetta eins og maður þarf að muna að þakka fyrir sig?" Svo útskýrði hann fyrir mér að það sem sölumönnum gengi til væri að hjálpa sér, ekki mér. Þessi ábending um að muna eftir einhverju væri annars eðlis en þegar mamma minnti mig á eitthvað. Sjálfur minnti hann mig aldrei á neitt því hann sagði aldrei neitt, í mesta lagi "jæja þú þarna strákur, nú förum við" ef ég hafði farið með honum í heimsókn eitthvað að honum fannst tími til að fara. En skilaboðin voru einföld, ef ég ginntist á einhverju sem reynt var að fá mig til trúa að ég þyrfti var ég búinn að tapa. Það heyrði upp á mig að velja hverju ég ætlaði að trúa og ég yrði að stóla á sjálfan mig í því (og hann náttúrulega).Um tuttugu árum seinna var ég staddur í einhverju partíi í Reykjavík. Einhver náungi vildi gefa mér merki sem á stóð "bankanum þínum þykir ekki vænt um þig". Ég hló að honum. "Auðvitað þykir honum ekki vænt um mig, samband okkar hefur aldrei verið tilfinningalegs eðlis, ég vil ekki að það sé tilfinningalegs eðlis. Hélstu það þarna vanvitinn þinn?" Hann þagði. Hemmi Gunn og pabbi hans höfðu sennilega ekki frætt hann nógu vel og hann hafði bláeygur fengið sé duglegan yfirdrátt og verið gerður eignalaus um tvítugt. 

Ég þurfti að komast í snertingu við þá báða til að læra þetta. Pabbi meinti vel, en ég þurfti líka að komast í bakteríuna til að ónæmiskerfið gæti þroskast. 

Ég eignaðist aldrei bílabraut. Langaði ekki í hana.


Of heimskir til að þegja.

Strákar fá stórar hugmyndir, og stærri eftir því sem þeir eru minni. Einu sinni ætluðum við nokkrir að grafa göng undir götu á Egilsstöðum, við höfum verið nýskriðnir í barnaskóla í mesta lagi. Veit um tvo sem ætluðu í þriggja mánaða útilegu á hálendinu og veiða sér til matar. Þeir hafa kannski verið tíu ára. Svo man ég eftir tveimur sem ætluðu að kaupa saman snjóbíl og stofna björgunarsveit. Annar átti 8.000 kall og hinn 9.000 kall. Þeir hafa verið um átta ára. Hitti þá í garðinum hjá öðrum þeirra þar sem þeir voru í óða önn að byggja veg í sandkassa. Sá sem bjó þar þagði, og þagði hátt á meðan hinn rausaði út úr sér áætlun þeirra og framtíðarplönum og að þetta væri ekkert mál. Hinn hafði vit á að þegja, hafði efasemdir um að þetta hefði verið hugsað til enda og þótti betra að segja sem minnst að svo komnu máli. Við vorum náttúrulega bara tittir, ég kannski tveimur árum eldri en þeir og hafði reynsluna til að sjá að þetta væri barnalegt bull sem ekki væri vert að ræða í alvöru, ég var ekkert gáfaðri eða efnilegri en þeir en reynsluna og þekkinguna hafði ég til að slá þetta út af borðinu. Svona bull er allt í lagi þegar maður er átta ára, en það á að eldast af manni. Núna hafa einhverjir heimskingjar tekið sig til vilja kaupa síðasta TBM borinn sem Ítalirnir eru að bora með. Það á að kaupa hann, því hann er svo stór. Göng eru stór líka og þá er hægt að bora þau með svona stórum bor. Enginn verktaki á íslandi kann að nota svona tæki. Engir peningar eru til að kaupa hann né til að bora með honum göng. Ekkert bendir til að það sé gáfulegt að reyna að bora með honum frekar en bora og sprengja. En hann er svo STÓR!!!! Það hlýtur að vera gott að vera með nógu stórann BOR!!!!. Það er hreinlega ömurlegt að hlusta á þetta, stendur á pari við pælingar smábarna um snjóbílakaup. Þurfti að sitja undir spurningum um þetta um daginn, þurfti að svara því hvort það væri mikið um svona vanvita fyrir austan, í guðana bænum ekki láta mig þurfa að sitja undir því aftur. Þegiði, þegiði, þegiði.

Ríkharður Hjartar Magnússon. S:847-0909 (því maður á ekki að kalla heimskingja heimskingja án þess að ætla sér að standa við það).


Íþróttaforeldrar og fiðlupabbar.

það er alltaf jafn gaman fyrir börn að horfa upp á foreldra sína gera sig að fílum. Það er að sama skapi alltaf jafn leiðinlegt fyrir börn að komast að því hverskonar fífl foreldrar þeirra eru. Ég hef horft upp foreldra mína reyna að slá um sig á ensku með mjög hallærislegum árangri, vandræðalegt en alveg ægilega fyndið, og verður ennþá þetra þegar frá líður. Ég hef séð feður rífast og stympast þar sem þeir horfðu á börnin sín í íþróttum. Það var hræðilegt því þessir menn voru ekki að gera sig að fíflum, þeir voru fífl. Það var ömurlegt fyrir börnin að horfa uppá þetta og hefur ábyggilega ekki skánað í minningunni. Fullorðið fólk rífast á almannafæri. Strákar heima á Egilsstöðum sem æfðu fótbolta sögðu mér að það væri voðalega svipað að spila allstaðar á austurlandi(held að það hafi ekki mikið verið farið í lengri ferðir) nema á Vopnafirði. Þar var illa þokkað að vera á kantinum því ef menn hættu sér of utarlega þá hræktu foreldrar og ömmur á þá. Ekki mikil sjálfsvirðing í því ef satt var. En ég er ekkert viss um að Vopnfirðingar hafi verið neitt verri en aðrir. Þeir gátu ekkert í frjálsum, fengu örfá stig ÚÍA mótum en rúlluðu upp fótboltaleikjum á móti félögum sem voru margfallt stærri. Ég held að fótbolti hafi bara verið málið á Vopnafirði og ekkert annað. Það er nefnilega hægt að láta allann fjandann vera málið.

"Ég vildi að það væri ekki svona margt sem þú fékkst ekki að gera" sagði stelpan við mömmu sína og hélt áfram að æfa sig á píanóið. "Ég ætla ekkert að fara að lifa ykkar drauma!" öskraði Daníel í næturvaktinni á pabba sinn, sem vildi að hann yrði læknir. Það er göfugt í sjálfu sér að vilja að sonur manns verði læknir, en það er alveg hræðilegt að neyða sonn sinn til að verða læknir. 

Mér varð hugsað til pabba Daníels í dag þegar ég las bakþanka fréttablaðsins. Þar var foreldri að lýsa þeirri hræðilegu uppgötvun að dóttir hennar langaði til að verða prinsessa, og þar að auki prinsessa sem Walt Disney hafði teiknað. Þrátt fyrir að hún hefði gert allt sem í hennar valdi stóð til að dóttirin yrði sjálfstæð hafði hún samt tekið ákvörðun sem henni var ekki þóknanleg. Og hún ætlaði að taka á þessu, dóttirin skyldi læra að vera sjálfstæð ALVEG EINS og mamma.

 Allar fýlulegar athugasemdir um að ég sé að kasta steinum úr glerhúsi, því ég eigi ekki börn eru afþakkaðar, sömuleiðis athugasemdir þess efnis að himininn sé blár og vatn blautt.

 


Þekki mann sem gerði þetta.

Að stela löggubíl er, og afsakið barnalegan kúkahúmorinn, er einhvernvegin alveg hræðilega fyndið í öllum sínum hroka. Ræflar rífast og slást við lögregluna, meiða lögregluna og annað ámóta virðulegt. En að stela af henni bílnum er svo yndislega hrokafullt, svolítið eins og Mr. Bean þegar hann setti dúkku í svefnpoka svo hann þyrfti ekki að bíða í röð með "venjulegum skríl" Ég þekki mann sem hnuplaði löggubíl. Þetta var á útihátíð á Eiðum, og hann hafði verið með einhverja ókurteisi svo löggan henti honum inn í bíl, járnuðum meðan hún skimaði eftir fleirum sem mætti stinga í svartholið sér og öðrum til viðvörunar. Hann tróð sér yfir sætið, læsti bílnum með olnboganum og tókst að koma bílnum í Drive. Bíllin tók að malla af stað, tommu fyrir tommu, rétt nógu hratt til að nærstaddir tóku eftir að hann hreyfðist. Uppi varð nú töluvert stand, lögreglu þjónar reyndu í tryllingi að komast inn, bæði með kurteisilegum en frekar ákveðnum beiðnum og því að hamast á hurðunum. Samlæsingin náði ekki til afturhlerans á bílnum og þar geystist löggan inn á endanum og stoppaði bílinn. Maðurinn fór að sjálfsögðu í grjótið fyrir vikið, var ekið í fangelsið á Egilsstöðum. Þá spurði hann hvort hann mætti ekki fá að hringja eitt símtal, það væri alltaf þannig í sjónvarpinu. Það var óþarfi að neita því og hann hringdi eitthvert símtal og fór svo í fangelsi. Hálftíma seinna kom svo pítsan sem hann pantaði og Kristleifur lögga kom með hana í klefann til hans ásamt  gaffli og skeið því glæpamenn fengju ekki hníf. Og svo átu þeir pítsuna saman og töluðu um hreindýraveiðar.
mbl.is Þjófur í járnum stal lögreglubíl
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband